Ajarakallahu

بسم الله الرحمن الرحيم

Ajarakallahu khairul mu’minin

Kamoe kheun amin, tgk meudo’a

Sang-sang kateuhah jannatun na’im

Sidum nan yaqin kamoe meudo’a

                        Ohban geupasoe mayet lam kubu

                        Keunan troeh laju ‘azeub diteuka

                        Hana soe tulong hana soe bantu

                        Melainkan le peu yang ek meusampoe

Yang pertama phoen ilme yang munanfa’at

Peutunyoek ummat bek roeh lam jahe

Tapubut ma’ruf sembahyang meuhat

Yang ek meusapat oeh wate mate

                        Tema kedua sadakah jariyah

                        Bak jalan Allah beu tathem bantu

                        Hate beu yaqin serta ikhlas

                        Bek na meusiblah riya lam hate

                        
Wahe saudara rakan meutuah

Bek sia payah hudep lam donya

Hudep lam donya beu leuheun-leuheun

Bek jeut keu umpeun apui nuraka

                        Aneuk yang shaleh tema yang keu le

                        Lam jeut-jeut wate meudo’a sabe

                        Sabe meudo’a keu bunda ayah

                        Ue dalam kubur amai beu dile

Meutan tapubut-tapubut pane na geubi

Syiruga tinggi hai akhi meu jeumba-jeumba-jeumba

Yoeh masa hudep tan tapeuduli

Tapubut keji sinoe lam donya

                         Meubek taharap-taharap syiruga tinggi

                         Menyoe tan amai tan amai pane na geubi

                         Dak meusi kapai diateuh buket

                         Leupah meusaket keunong teuka ie

Tuntot ileume sinoe lam nanggroe

Jeuname putroe jeuname putroe dalam syiruga

Jeuname putroe nyankeuh ibadat

Bek sagai silap wahe saudara

Leupah that sayang leupah that sayang oeh uroe dudoe 
Digob na putroe digop na putroe digata hana 
Hana ue ban ban ureung meulumpoe 
Sayang soeh jaroe oeh wate jaga

Na le droe ureung wajeb taturi

Bek tameu ungki wahe saudara 
Taturi ibu ka dengon ayah

Ureung peuleumah langet ngon donya

Adek lon sayang sayang beudoh meunontot 
Beudoh tajak beut keunoe ue dayah 
Bek laloe sabe taduk bak empeun 
Oeh rayeuk hanjeut sapeu digata

Taturi gure ureung peurunoe

Taturi lakoe droe ureung useuha

Peu-peu yang hawa sabe lako bloe

Lam geunap uroe gata geujaga

Simasa nabi nibak siuroe 

Ue bak aneuk droe na neukeubah sabda 

Soe-soe peusaket hate di lakoe
oeh uroe dudoe geugiloe dalam nuraka.